Visites
Rutas de Nava

PLANO RUTA VIOBES

Mapa

Ver Fotos I
Ver Fotos II
Ver Fotos III

Entama al par de la señal indicativa de Viobes al llegar dende Nava. Pel camín de la drecha báxase un paréu poco pindiu hasta "La Cueva", sitiu onde ta’l depósitu de bombéu de la rede d’abastecimientu d’agua y la cueva natural na que s’atopa medio enterráu l’antiguu llavaderu del pueblu. Siguiendo de contino p’hacia l’este y en llano empobinamos pa la llende del pueblu col vecín de Cuenya pasando’l "Castañéu Monte" silenciosa viesca con especies d’árboles del país, debaxo la so solombra ye perfácil columbrar dalgún xabaril, corzu, esguil, raposu o especies de páxaros tan poco vistes como la cabralloca, l’abubilla, el ferre o la curuxa, amás de les más abundantes na zona, ñervatos, pegues, etc. En pasando l’arboláu llegamos a un encruz qu’empobina a Cuenya (Norte), Paraes (Sur) y Viobes (Oeste). Nesti puntu, na finca que queda ente los dos ramales, un prau con una cabaña de madera, asítiase la "Cueva de les Xanes", caverna natural na que va poco los miembros del Serviciu de Proteición de la Natura de la Guardia Civil encontraron cachinos cerámicos datados alredor del sieglu IX. Trátase d’una abertura a lo cabero d’una falda de piedra calizo que ta cásique tapada pola maleza y la sedimentación de la que los más vieyos del llugar cuenten de la so fondura pergrande y de los munchos ramales interiores que tien, usóse como abellugu na contienda civil. Garrando’l desviu hacia Viobes pero ensin llegar a les primeres cases, empobinamos hacia l’este otra vuelta pel camín asfaltáu unos 300 metros pa, yá en pista de “guijo”, baxar per una cuesta arimada que mos dexa na "Fonte de Cabolaya", con fonte, bebederu pal ganáu y antiguu llavadero d escubiertu. Los vecinos traíen el ganáu a beber dos o tres veces diaries pos nun esistía la rede d’agua pal usu de les cases. A unos metros el camín estrémase de manera que de frente tiraríemos pa Cuenya. Garramos l’otru ramal, al norte pa llegar dempués d’unos 200 metros al llugar conocíu como "Piedres Llanes", que nun ye otra cosa que una llosa de piedra al ras del suelu d’unos 500 metros cuadrados que nos f ala de la formación xeolóxica de la rodiada, de conglomeraos calcáreos propios de les facies continentales del Terciariu inferior del Sinclinoriu Uviéu-Infiesto, na Cuenca Mesoterciaria asturiana, que percorre como un cintu de sidementos de suave relieve y trazáu subparalelu a la costa.Pue siguise la baxada hasta’l ríu "Merenderi", pero agora tornamos pal pueblu volviendo atrás unos 50 metros y garrando’l camín de la drecha; Salimos a la carretera AS-357. A l’altura de la cabera vivienda del pueblu en direición a Villaviciosa y xusto nel cruz, onde s’atopa’l Yacimientu númberu NA-66, tiramos pel camín de la drecha que baxa en pendiente poco pindia hasta’l ríu "Bregón" que ye’l nacimientu del afluente del ríu Ali y de la riega que forma’l nacimientu del ríu "Salar", dende onde entamamos un ascensu per una pista forestal que va dando vuelta a delles canteres d’arena y grava qu’hai hasta tornar a la carretera AS-357 (p.k.5+050). Nesi puntu conocíu como "Colines" columbramos los pastos del conceyu, les pistes de MotoCross feches aprovechando les canteres yá esplotaes, el campu de tiru "El Cuervu", dientro del que s’asitia la "Fonte Colines" y el "Llagu del Enguilu". Esta llaguna artificial qu’anguaño ta en víes de recuperación ambiental, formóse al inundase a lo cabero de los años 60 otra antigua cantera. Dende equí vamos a caminar pela carretera en direición a Viobes dende’l kilómetru 5 hasta el 3,5 de la AS-357 Nava- Altu la Campa d’Arbazal. Xubimos dende’l pueblu hasta’l kilómetru 4 de la AS-357 Nava- Altu la Campa d’Arbazal y al pie de la señal esviamonos pel camín de la izquierda pa emprimar la xubida al "Castru de La Forcá", que ye’l yacimientu númberu NA-65 de la Carta Arqueolóxica de Nava. Llegamos dempués d’unos 400 metros de xubida hasta una finca particular arrodiada por pista forestal pública dende la que vemos la panorámica de tol conceyu de Nava asina como parte de los conceyos de Cabranes, Villaviciosa, Sariegu, Piloña y Siero. Vense tamién los "Picos d’Europa", parte de los montes de Llaviana y el Parque de Redes, ensin escaecer que nos díes abiertos y tando empericotiaos nes peñes de la cima, debaxo les que s’escondíen los vecinos cuando los bombardeos de la Guerra Civil, colúmbrase’l cume de la Catedral d’Uviéu y aciértase a ver al norte la costa cantábrica. Pembaxo, vemos les cases del pueblu y la Capiella de San Esteban, a les que podemos llegar per una caleya. A metá de camín atopamos la "Fonte de la Forcá", arrodiada de sillería.


Niveles
Valid XHTML 1.0 Strict CSS ok
Web oficial del Pueblu de Viobes. Ayuntamientu de Nava (Asturies)
ZobyHost discontinuará su servicio de alojamiento web gratuito en los próximos días.
Recomendamos a los usuarios mudar sus sitios a nixiweb.com