Asoc.Vecinos



Logotipo Viobes, 8 d’avientu, 2008

Amigos/es y Vecinos/es de Viobes,

Dexá-ymos aportar a les vueses cases per aciu d’esta carta que ye tamién el nuesu primer saludu a toos vosotros y la bienvenía a l’acabante nacer: ASOCIACION DE VECINOS “PUEBLU DE VIOBES”.
Anque nun ye un entamu nuevu, fai unos meses, un garapiellu de vecinos del pueblu punxiémonos d’alcuerdu nesto: l’interés de tolos vecinos nun ye cosa de caún, ye daqué que mos toca a toos. Somos un pueblu vivu, con vecinos de toles edaes y coles meyores espectatives pal nuestru rodiu, la calidá de vida de les nueses families y les ayudes a ameyorar los servicios que faen amañosa la vida de toos.

Amás de formar una Asociación de Vecinos con una voz que s’escuche nel Ayuntamientu de Nava y que seya activa na llucha polos intereses del Pueblu, tamién queremos que l’Asociación contribuya a la vida social y cultural de Viobes, entamando actividaes que fomenten l’intercambiu y la participación ente tolos vecinos, la mocedá y los más mayores.

Esta Asociación de Vecinos Pueblu de Viobes ye de toos y pa toos, porque busca actuar pa caltener lo bueno del nuesu pueblu y pa lluchar por ameyorar lo que nun funciona, independientemente d’idees polítiques, relixoses etc. Nesti sen taremos en contautu con otres Asociaciones de Vecinos de la Comarca, que tamién sienten la necesidá d’axuntase y organizase, porque ser ún ye ser débil y cuantos más seyamos más posibilidaes tenemos de defender los nuesos intereses.

Agora, amás de presentavos esta Asociación de Vecinos, aprovechamos pa decivos que yá tenemos un llocal perbién asitiáu nel pueblu y que gracies al apoyu del so propietariu, Argentino Agüeria, y del Ayuntamientu de Nava y de toos vosotros, podrá ser un sitiu d’aconceyu y xunta.

Pa que toos estos planes seyan realidá PRECISAMOS EL VUESTRU APOYU, necesitamos que-vos unáis a l’Asociación y necesitamos la vuesa participación activa pa poner a funcionar el llocal ya en toles actividaes que podamos programar. Ye un proyeutu de toos.

Tamién necesitamos una financiación mínima, amás de les ayudes que podamos algamar del Ayuntamientu de Nava, l’Asociación necesita un fondu mínimu pa ser operativa, por eso marcamos una cuota mínima d’inscripción de 30 € pa ca sociu. Esta cuota menguará a 6 € pa los socios que vivan na mesma casa.

Na próxima Asamblea de Vecinos de l’Asociación votaremos la composición cabera de la Xunta: Presidente, Secretariu, Ayalgueru, etc.

L’Asociación de Vecinos Pueblu de Viobes tien ya una cuenta abierta en CAXASTUR na que podéis ingresar la cuota d’aniciu n’Asociación, arriba conseñada de 30 € pal primer sociu y de 6 € pa caún de los demás que vivan na mesma casa.

IBAN ES93 2048 0017 1234 0400 0349
Los qu’aniciamos con esta Asociación de Vecinos, esperamos compartir la nuesa ilusión con toos vosotros, y tamos xuros de que l’axuntanza fai la fuerza y que sólo la unión nos llevará a un futuru meyor pa Viobes y los sos vecinos. CUANTOS MÁS SEYAMOS MÁS FUERTES SEREMOS.

Dámosvos les gracies yá agora y cuntamos con vosotros.

Un saludu candial.

Baxada d'estatutos estatutos

Valid XHTML 1.0 Strict CSS ok
Web oficial del Pueblu de Viobes. Ayuntamientu de Nava (Asturies)
ZobyHost discontinuará su servicio de alojamiento web gratuito en los próximos días.
Recomendamos a los usuarios mudar sus sitios a nixiweb.com