Historia



historia 1 Ensin dulda al falar de la hestoria más antigua de los pueblos astures hai qu’enfotase n’albidros, a vegaes sofitaos en pequeños ñicios. Nel casu de Viobes nun sería munchu aventurar si afirmamos que’l so asentamientu primeru tuvo situáu más al este del actual barriu de "El Rebollal", nun llugar u tovía güei s’atopen finques nomaes como “Castañéu de la Quintana”. Esti garapiellu d’edificaciones que tán yá cásique en ruines desaníciense del too coincidiendo cola reconstrución de la Ilesia parroquial de San Bartolomé de Nava que bombardiaran cuandu la Guerra Civil, por cuenta de que los sos materiales cediérense y baxárense a Nava a carretaes. Si cuntamos con qu’a una distancia de pocu más d’ún kilómetru al norte sacóse barru pa la fabricación artesanal de teya árabe (al rodiu los años 50 fízolo Manuel Benito en Colines), cola proximidá al pueblu de Cecea de persabía tradición ¿¿escabechera?? y con qu’a unos 400 metros d’esta quintana allúgase la "Cueva Les Xanes", cueva natural na qu’aparecieren sobro l’añu 1998 pedazos cerámicos con daqué valir y d’una antigüedá calculada p’hacia’l sieglu IX, nun sería desacertao pensar qu’estos pobladores dedicábense historia 2 de mou especial a l’actividá alfarera. Les construcciones más antigües que se caltienen, nun cuntando la Casa d’Esperanza, fecha con verdasquera (barru y cañes d’ablanar y castañal) asitiada na falda norte al pie del depósitu d’agua, son les del barriu de La Vega, que fueron de Feliz y de la familia Noriega que dempués marcharen a Sienra, en Cecea. Nesta última facía madreñes Belarmo Nevares. Tán asentaes na falda del monte. Poro los sos pobladores primeros bien pudieron dedicase a la madera y a los sos derivaos, asína como a la estracción de piedra ya que d’ello dexen constancia los numberosos "calieros o calderos" que s’atopen na rodiada. Yeren furacos cavaos en suelu onde s’apilaba lleña y garabaya, enriba d’ellos colocábense piedres calices tapaes cola tierra de la escavación. Dempués de la quema, sacábase’l cal cola que s’abonaben los praos y fertilizábense fasteres baxes del monte pa camudales en praderíes y tamién s’alimentaba al ganáu. L’últimu calieru conocíu tuviéronlu cociendo en "La Forcá" Benigno Llamedo y Ceferino Sastre enriba del sitiu que nomen "Pinar de Dulia" nel so centru asitiase la "Fonte del Llosu La Morena". La economía más recién de la zona sofitóse na esplotación de los bienes de los montes cercanos "Enguilu" y "Campiellu". Piedra, madera, pastu, barru, etc., salieron en direición a Viobes dende estos montes historia 1 comunales del Ayuntamientu de Nava, por posesión quieta y pacífica dende tiempu perantiguu, la so inscripción rexistral más ancestral data aproximao del añu 1890. Dambos montes semáronse de pinu “radiata” pola Diputación Provincial d’Uviéu, foi Marino Torga y Adriano Vega los sos guardamontes hasta que se cortaron y desapaecieron. Los neños de la Escuela apañaben sacaos de piñes, que tresportaben los camiones que diben a por arena a les canteres, y vendíenles pa pagar los viaxes d’estudios a les playes de Llanes. D’estos montes tamién se sacaba’l rozu colo que s’estraben les cuadres p’aprovechar el cuchu del ganáu. Na posguerra foron el principal sustentu de la población al mantener al rebañu d’oveyes y escases vaques de los vecinos que diben en tren a Uviéu pa vender la lleche, el quesu y la llana, amás de daqué carne. Los más atrevíos tamién garraben castañes, nueces y productos cinexéticos de la zona: truches, anguiles, corzos, melones y raposos. historia 1

Valid XHTML 1.0 Strict CSS ok
Web oficial del Pueblu de Viobes. Ayuntamientu de Nava (Asturies)
ZobyHost discontinuará su servicio de alojamiento web gratuito en los próximos días.
Recomendamos a los usuarios mudar sus sitios a nixiweb.com